د اردو او پوليسو تر منځ خونړۍ نښتې مرګ ژوبله اړولې
(کابل ټکی کام ۱۳۹۶غبرګولی ۹) الماس خدرخېل
د ملي اردو او پوليسو تر منځ نښته شوې، چې له امله يې له دواړو خواوو لسو سرتيرو ته مرګ ژوبله اوښتې ده.
د ارزګان د ولايتي شورا رئيس امیرخان بارکزي رسنيو ته ويلي، پرون ماذيګر ناوخته د چورې ولسوالۍ په بازار کې د ملي اردو او پوليسو تر منځ خونړۍ نښته شوې، چې ۲ پوليس او يو د ملي اردو عسکر پکې وژل شوي دي.
نوموړی زياتوي، په دغه نښته کې ۵ پوليس او د ملي اردو دوه عسکر ټپيان شوي هم دي.
هغه وايي، د دواړو لوريو د نښتې د رامنځته کېدو لامل نه دی څرګند، خو لومړی لفظي شخړه شوې او وروسته بيا د ملي اردو او پوليسو په خپلو منځونو کې سره ډزې کړي دي.
په عين حال کې د ولايت چارواکي هم پېښه تائيدوي خو تر دې دمه امنيتي مسئولينو په دې اړه رسنيو ته څه نه دي ويلي.
