(کابل ټکی کام ۱۳۹۶غبرګولی ۱۶) الماس خدرخېل
نن سې شنبه په پلازمينه کې د ۲۷ هېوادونو د لوړپوړيو استازو او د يو شمير نړيوالو بنسټونو په ګډون د کابل پروسې ناسته پيل شوه.
په دغه غونډه کې د ګاونډيو هېوادونو سربېره هند،امریکا، جرمني، ترکیه، جاپان، سعودي، برتانيا او د ملګرو ملتونو او اروپايي اتحاديې استازي هم ګډون لري.
د ولسمشر د مطبوعاتي دفتر سرپرست شاه حسين مرتضوي وايي، (کابل پروسه ناسته د دې لپاره جوړېږي، څو موږ وکولاى شو چې له سولې او ترهګرۍ سره د مبارزې يوه سيمه ييزه او له سيمې وتلې قوي اجماع ولرو).
د نوموړي په وينا په دغه ناسته کې به د سولې د پروسې د مخته وړلو سربيره د ترهګرۍ سره د مبارزې او نورو اړونده برخو بحث وشي.
بايد وويل شي، چې تېره ورځ د بهرنيو چارو سرپرست وزير صلاح الدين رباني ګواښ وکړ او ويلي يې و، که په دې غونډه کې د ملي امنيت سلاکار محمد حنيف اتمر ګډون وکړي نو دی (رباني) به له ګډون ډډه وکړي.
خو اوس مهال چې د تلويزيون له لارې غونډه نشريږي د ملي امنيت سلاکار د ولسمشر ترڅنګ ناست ليدل کېږي.
