(کابل ټکی کام ۱۳۹۶غبرګولی ۲۰) الماس خدرخېل
د ترکيې ولسمشر رجب طيب اردوغان د سعودي او نورو خليجي هېوادونو غوښتي چې په قطر لګېدلي بنديزونه دې لرې کړي.
هغه ويلي، د قطر منزوي کول د ستونزې هواری نه دی او ژمنه يې وکړه چې په سيمه کې د رامنځته شوې ستونزې د حل لپاره به خپلې هلې ځلې جاري ساتي.
طيب اردوغان وويل، موږ به خپل قطري وروڼه يواځې پرېنږدو او له سعودي څخه يې په ځانګړي ډول غوښتنه وکړه چې (تاسې د په خليج کې تر ټولو ځواکمن او ستر دولت ياست. موږ مو د دوو سپېڅلو ځايونو ساتندويان بولو. تاسې بايد په ځانګړي ډول د دوستۍ لپاره کار وکړئ، نه دښمنۍ لپاره. دا هغه څه دي چې مونږ يې له تاسې د دوه سپيڅلو ځايونو د ساتندويانو په توګه هيله لرو).
په عين حال کې اردوغان د پارلمان هغه پريکړه تائيد کړې، چې له مخې به يې قطر ته د ترکيې پنځه زره پوځيان لېږل کېږي.
ادوغان په قطر د لګېدلو بنديزونو په اړه وايي، دا بايد په بشپړ ډول لرې شي او زياته يې کړه کله يې هم دوحه د ترهګرۍ په ملاتړ کولو نه ده ليدلې.
د هغه په وينا: (ځینې نارامه کېږي چې موږ له خپلو قطري وروڼو سره ودرېږو او خواړه ورلېږو. بښنه غواړم، زه به له قطر سره هر ډول ملاتړ ته دوام ورکړم).
