(کابل ټکی کام ۱۳۹۶غبرګولی ۲۰) الماس خدرخېل
د امريکا د متحده ايالاتو ولسمشر ډونالډ ټرمپ وايي، په خليجي هېوادونو کې رامنځته شوی ديپلوماتيک کړکيچ په ترهګرۍ ضد جګړه ناوړه اغيز کولی شي او له خليجي هېوادونو يې غوښتي چې د ترهګرۍ پر وړاندې خپلې هڅې لان ګړندۍ کړي.
نوموړي سپينې ماڼۍ کې د يوې خبري ناستې پر مهال وويل، قطر په لوړه کچه د ترهګرۍ تمويلونکی دی او بايد دا تمويل نور ختم کړي.
د نوموړي له دې څرګندونو شېبه وړاندې د متحده ايالتونو د بهرنيو چارو وزیر ريکس ټيلرسن له سعودي، عربي اماراتو او بحرين غوښتنه وکړه چې له قطر سره بیرته خپلې اړيکي ورغوي.
ټېلرسن ويلي، چې د خليجي هېوادونو له بنديزونو سره به دغه هېواد د خوراکي توکو له کمښت سره مخ شي.
هغه له ټولو هېوادونو غوښتي چې راپيدا شوې ستونزه دې د خبرو له لارې حل کړي او د کويټ د امير صباح الاحمد د منځګړيتوب د هڅو ستاينه کړې.
خو بل پلو د قطر رسنيو خبر ورکړی، چې دغه هېواد کې د لګېدلو بنديزونو وروسته هيڅ ډول ستونزه نه ليدل کېږي او يواځې دومره ده چې دسعودي مالونو پر ځای ايراني خوراکي توکي ډير ورغلي دي.
سعودي او درو نورو ملګرو هېوادونو یې د تېرې پنجشنبې په ورځ هغه لیست خپور کړ چې ګني قطر له وسله والو سره اړیکي لري. په دې لیست کې ۴۹ کسان دي، چې شیخ یوسف القرضاوي او ۱۲ نورې هغه خیریه ټولنې او ډلې هم پکې دي چې قطر یې ملاتړ کوي.
بايد وويل شي، چې د منځني ختیځ په کچه په قطر کې د امریکا تر ټولو لویه نظامي اډه شتون لري.
