(کابل ټکی کام ۱۳۹۶غبرګولی ۲۰) الماس خدرخېل
د افغانستان د ولسي جرګې غړي او يو شمير ښاريان وايي، چې په کابل ښار کې درول شويو د تحصن خيمو يې ژوند له مشکلاتو سره مخ کړی او له حکومته په دې اړه د جدي اقدام غوښتنه وکړه.
د جرګې غړي وايي، په خيمو کې راټول شوي هغه خلک دي چې د ورځې تيرولو لپاره نور ځای نه لري او په خبره يې چې ځينې کړۍ شته چې د وروستيو پېښو څخه سياسي استفاده کوي.
ددوی په وینا، هغه کسان چې پر حکومت فشار راوړي، چې څوکۍ تر لاسه کړي له ځوانانو استفاده کوي او په دغه ډول نامشروع لارو پر حکومت فشار راوړي.
د کابل ښاريان وايي، له دغو خيمو سره يې ژوند سخت شوی او د خوراکي توکو بيې هم لوړې شوي دي.
د ښار اوسېدونکي وايي، مريضان يې پر وخت روغتونونو ته نه رسېږي او وخت ناوخت په خيمو کې د ناستو ځوانانو له لوري ځورول کېږي.
عمادالدين وايي، د کاته پروان په څلور لارې کې لګول شيمې خيمې ټولې لارې بندې کړي او خلکو ته يې ستونزې جوړې کړي دي.
په سوشل ميډيا په خيمو کې د ناستو کسانو مسلح انځورونه خپاره شول او يوه باوري سرچينه وايي د تورو شيشو موټرو کې ورته وسلې هم راوړل شوي دي.
دوه ورځې مخکې ولسمشر له امنيتي ارګانونو غوښتي و چې د اعتراض کوونکو مسله خلاصه کړي خو تر دې دمه نه دي بريالي شوي.
د راپور له مخې يو شمیر وکيلانو ويلي، چې ځينې استخاراتي کړۍ غواړي چې په کابل کې د وروستي بريد د هيرولو هڅه وکړي ځکه دغه ډول حرکتونه کوي.
