د فاریاب ولایت د خواجه سبز پوش ولسوالۍ چارواکي وايي چې جګړه د ولسوالۍ تر مرکزه رارسېدلې ده او ولسوالي د سقوط له ګواښ سره مخ ده.
د خواجه سبز پوش امنیه قومندان عبدالله معصومي رسنیو ته ویلي چې طالبانو د قره شیخي د ستراتیژیکې او مهمې سیمې له نیولو وروسته نور هم پرمختګ کړی دی او ګڼې سیمې یې نیولې دي.
معصومي وايي، تېره اونۍ طالبانو د قره شیخي سیمه ونیوله او اوس یې د ينګي قلعه، کته قلعه، سرای قلعه او بايم اوغلي سيمې نيولې دي.
د یادې ولسوالۍ امنیه قومندان د طالبانو له همغږۍ سر ټکوي او وايي چې سیمې ته د طالبانو نور کومکي ځواکونه رارسېدلي دي. د نوموړې په خبره که دولت بېړنۍ مرسته ونکړي ولسوالي به په مکمله توګه د طالبانو لاس ته ولوېږي.
