د شپیگل مجلې د الماني چارواکو له قوله په یو خپاره کړي راپور کې څرګنده کړې ده چې ښایي د راتلونکي چهارشنبې په ورځ د اخراج لړۍ بیرته د آلمان له ښارونو پیل شي.
څو اوونۍ مخکې په کابل کې یوې سختې چاودنې آلمان دې ته اړ کړ چې په موقتي توگه افغانستان ته د رد شویو پناه غوښتونکو د اخراج لړۍ ودروي.
د کابل تر چاودنې وروسته د جرمني حکومت دبهرنیو چارو وزارت له لوري د امنیتي وضعیت تر ارزولو پورې افغانستان ته د اخراج د لړۍ پر درولو باندې توافق کړی وو. د آلمان صدراعظمې انگلا مېرکل هغه وخت ویلي وو چې ښایي د دوی څبړنې تر جولای میاشتې پورې وخت ونیسي.
بلخوا یو شمیر آلماني سیاستوال بیا د پناه غوښتونکو استول پر ځای کار نه بولي او په وینایې چې افغاستان کې لا هم امنیتي اندیښنې په ځای پاتې دي.
دا پداسې حال کې ده چې روانې میاشتې په سر کې د آلمان د بهرنیو چارو وزیر زیگمار گبرایل له طالبانو سره د سولې د خبرو اترو له پاره غږ کړی وو. هغه له رسنیو سره په خبرو کې ویلي ؤ چې په افغانستان کې د یوه سیاسي حل لارې د موندلو له پاره باید له طالبانو سره خبري وشي.
خو د مهاجرینو د خروج دغه راپورونه لا په رسمي توگه نه دي تائید شوي.
د یوې جرمنۍ ورځپاڼې د راپور په استناد د روان میلادي کال د اپریل میاشتې تر پای پورې آلمان په ټوله کې ۸۶۲۰ رد شوي پناه غوښتونکي اخراج کړي دي. په تیر میلادي کال کې آلمان ۲۵۰۰۰ رد شوي پناه غوښتونکي خپلو اصلي ټاټوبو ته استولي وو.
همداشان یادې ورځپاڼې لیکلي چې د اپریل میاشتې تر پای پورې ۱۱۱۹۵ کسان چې د پناه غوښتنه یې رد شوې وه، په خپله خوښه خپلو اصلي ټاټوبو ته ورستانه شوي وو. په ۲۰۱۶م کال کې بیا ۵۴۰۰۶ تنه په خپله خوښه د ستنیدو پروگرام له لارې خپلو هیوادونو ته تللي وو. دغه پروگرام د داو طلبو ستنیدونکو د سفري لگښتونو تر څنگ مشخص مصارف هم رانغاړي.
د یادونې وړ ده چې اروپایی هیوادونو په مهاجرینو خپله کړۍ راتنګه کړې ده او نه غواړي ډیر مهاجرینو ته ځای ورکړي
فرید افغان
