طالبانو شل تنه بندي عسکر ازاد کړل
(کابل ټکی کام ۱۳۹۶چنګاښ ۳)
وسله والو طالبانو د کوچني اختر په مناسبت او د خپل مشر د ځانګړي فرمان له مخې د ملي اردو شل تنه بندي عسکر ازاد کړل.
د ملي اردو دغه کسان د ياد ولايت په دهراود ولسوالۍ کې د تېرې جمعې په ورځ خوشې شوي او د هغوی کورنيو ته سپارل شوي دي.
دغه عسکر د تيرو شپږو مياشتو په موده کې د طالبانو له لوري د ارزګان مرکز او بېلابېلو ولسواليو کې د جګړو پر مهال نيول شوي و.
طالبانو تېره میاشت هم د کندهار ولايت په ارغنداب ولسوالۍ کې د خپل مشر په فرمان يوولس بندي عسکر خوشې کړل.
په تازه نشر کړې خبر پاڼه کې طالبانو ويلي، چې د روژي مبارکي په لمړۍ لسیزه کې يې د خپل مشر هیبة الله اخندزاده په فرمان دکندهار ولایت په غورک ولسوالۍ کې ۶۲ تنه اسیرعسکر اوپولیس ازاد کړي دي.
ـ الماس خدرخېل-
