تیره ورځ اسرایلو د بشارالاسد رژیم ته وفادار پوځ باندې بې شمیره راکټي بریدونه کړي چې سوریې ته یې مالي او ځاني زیانونه اړولي دي.
اسرایل وایي برید یې د هغو توغول شویو توغندیو په ځواب کې کړی چې د سوریې له خاورې ورغلي.
د اسرایلي پوځ ویاند په خپره کړې خبرپاڼه کې ویلي دي چې د سوریې د خاورې نه د اسد ځواکونو یو راکټ د اسرایلو تر حمایي لاندې د ګولان تپه په نښه کړه، چې دوی هم سمدواره بالمثل اقدام وکړ او د سوریې پوځي مراکز یې وویشتل.
اسرایل وایې د سوریې لخوا توغول شوی راکټ په یوه دښته کې لګیدلی چې زیانونه نلري
له دې سره همهاله د اسرائیلو د لومړي وزیر نتنیاهو د دفتر لخوا په خپره شوې خبرپاڼه کې راغلي دي چې لومړي وزیر نتنیاهو د ګولان ټپو د کاتسرین د یهودانو په کلي کې وینا کوله چې په سیمه راکټي برید وشو.
نتنیاهو ویلي چې« زما د وینا پر مهال په سیمه کې د سوریې لخوا راکټي برید وشو. مونږ به دا ډول بریدونو ته هیڅوخت اجازه ورنکړو چې د همدې امله اسراییلو پوځ متقابل لازم ځواب ورکړ. په مونږ چې هر څوک برید وکړي په هغوې برید کوو. دا زمونږ سیاست او دریځ دی او همدې سیاست ته به دوام ورکړو. »
د سوریې چارواکو په دې اړه تر اوسه کوم غبرګون نده ښودلی .
دا پداسې حال کې ده چې څو میاشتې مخکې هم اسرایلو د سوریې پوځي مراکز په نښه کړي ؤ.
د یادونې وړ ده چې پدې وروستیو کې اسرایل او امریکا د سوریې د پوځ په ضد هوایی او ځمکنیو بریدونو ته دوام ورکړی چې دې چارې روس اړ کړی چې امریکا ته رسمي خبرداری ورکړي
