د الجزیرة نه په مننې
ژباړه: عزیر اسدخیل
د قطر امیر الشیخ تمیم بن حمد آل ثاني د جاپان د صدراعظم (شینزو ابی) لخوا تلیفوني اړیکه ترلاسه کړې، په دې تلیفوني مکالمه کې د جاپان صدارعظم د خلیج د تازه قضیې د حل موندلو په موخه د کویت د هڅو او هلو ځلو ملاتړ اعلان کړ.
(ابي) د خلیج د مشکل په اړه د جاپان د خلکو په استازیتوب خپله ژوره اندیښنه څرګنده کړه، او د څلورو هیوادونو هر یوه سعودی، اماراتو، بحرین او مصر پریکون یې یو افراطي او غیر منطقي کار وګڼلو.
د جاپان صدراعظم ټینګار وکړ چې هیواد به یې د دغې قضیې د حل لپاره د کویت د ډیپلوماتیکو هڅو،هلو ځلو او منځګړتوب کلکه مرسته او ملاتړ وکړي.
ابی د خپل هیواد عزم په ډاګه کړ چې د قطر سره به په سیاسي، اقتصادي، او امنیتي اړخونو کې هر ډول ملګرتیا او همغګۍ ته دوام ورکړي. هغه د قطر له دولت نه مننه وکړه چې د ده هیواد ته یی د ځواک د مرستو ورکولو ته دوام ورکوي.
سعودي، بحرین، اماراتو او مصر د کویت دولت ته یو جدول سپارلي چې پکې له قطر نه ۱۳ غوښتنې شوي، چې له جملې نه یې له ایران سره د خپلو دیپلوماتیکو اړیکو کمول، په قطر کې د ترکیې نظامي هډه سملاسي بندول، له ترهګریزو او نورو هغو ډلو ټپلو او ګوندونو سره اړیکې پرې کول چې دوی یې مرسته کوي، مطلوب ترهګر اشخاص ورسپارل، او برسیره پر دې د الجزیرة تلویزیوني چینل او ټول هغه خپرنیز چینلونه چې قطر یې مالي مرسته او ملاتړ کوي بې ځنډه بندول شامل دی.
دغه قضیه د جون په ۵مه هغه مهال پیل شوه چې سعودي، اماراتو بحرین او مصر له قطر سره خپلې اړیکې پرې کړې، او پر دغه هیواد یې له ترهګرو سره د مرستې په تور هوایی او ځمکني بندیزونه ولګول، چې دوحې په سختۍ سره رد کړل او زیاته یې کړه چې هیواد یې د درواغجنو تورونو هدف ګرځیدلی چې موخه په دغه هیواد خپلې سیاسي کړنلاري وتپل شي.
