د لویدیځو مطبوعاتو په استناد داسې انګیرل کیږي چې امریکا غواړي افغانستان ته د ۳ څخه تر ۵ زرو پورې تازه دمي سرتیري او ناټو بیا د ۱۲۰۰ په شاخوا کې سرتیري ولیږي.
د ناټو سرمنشي “ینس سټولټنبرګ” نن د بروکسل په کنفرانس کې چې د ناټو ۱۵ غړي هیوادونه یې ګډونوال ؤ د تازه روزونکو سرتیرو لیږد تایید کړ.
نوموړي وویل چې د دې نړیوال ائتلاف غړو هیوادونو افغانستان ته د نورو سرتیرو پر لیږد هوکړې ته رسیدلې ترڅو د افغانستان د ملي امنیتي ځواکونو روزنه پرمخ یوسي او له دوی سره په ګډه کار وکړي.
سټولټنبرګ په وضاحت سره وویل چې د سرتیرو دغه زیاتول په دې معنی نه دي چې د ناټو سازمان به یو ځل بیا په افغانستان کې د طالبانو د ځپلو له پاره د جګړې میدان ته داخل شي.
د نوموړي په وینا چې ناټو په افغانستان کې خپل جنګي ماموریت دوه کاله مخکې پای ته رسولی او د بیا ښکیلتیا اراده نلري
د کنفرانس په جریان کې بریتانیا د ۱۰۰ سرتیرو د لیږلو وړاندیز وکړ او په وینا یې یاد سرتیري د روزنې پرته د هیڅ جنګي عملیاتو لپاره ندي
دا په داسې حال کې ده چې د ناټو پوځي سازمان ۱۵ غړو هیوادونو روانه میاشت د بندو دروازو ترشا په یوه ناسته کې پریکړه کړې وه چې دوی افغانستان ته د دوی د ۲۰۱۸م کال د پوځي ماموریت له پاره د سرتیرو او پوځي تجهیزاتو د لیږد له پاره چمتوي دي.
اوسمهال په افغانستان کې د ناټو ماموریت په چوکاټ کې کابو ۱۳۴۵۰ سرتیري په افغانستان کې په دنده ګمارل شوي ترڅو د دې هیواد امنیتي ځواکونه وروزي. له دې ډلې څخه شاوخوا ۸۴۰۰ یې امریکايي او پاتې ۶۹۰۰ سرتیري یې بیا د ناټو د سازمان د غړو هیوادونو پورې تړاو لري.
د یادونې وړ ده چې څو ورځې وړاندې طالب مشرتابه هم خبرداری ورکړی ؤ چې لویدیځ دې د سرتیرو د زیاتولو احمقانه مفکوره له ذهن څخه وباسي ځکه افغان ملت به یې پرضد له هیڅ راز وسیلې دریغ ونکړي.
بلخوا د امریکا د کانګریس ډیری غړي او د اروپایی هیوادونو زیات نفوذي ګوندونه په افغانستان کې د سرتیرو د ډیرولو سره سخت مخالفت کوي
