د ناټو د۱۵ هیوادونو د دفاع د وزیرانو په غونډ کې د امریکا د دفاع وزیر جېمز ماتېس وویل، د امریکا متحده ایالتونو او ناټو له افغانستانه د خپلو ځواکونه لوړ شمېر ډېر ژر کم کړی دی.
نوموړي زیاته کړه چې :” که شا ته وګورو، ډېری به دا ومني چې موږ خپل سرتېري وختي اېستلي، شمېر به مو یې له وخته وړاندې کم کړی وي.”
ماټیس د یوې پوښتنې په ځواب کې وویل، چې د افغان جګړې د ختمولو مهالویش نه شي ورکولی، ځکه دا نه معلومیږي، دا جګړه کله ختمیږي او کله کمیږي.
د چارو د پوهانو په آند د امریکایی دفاع وزیر خبرې معنا لرونکې او مطلبي وې، دنوموړي له خبرو را څرګندیدله چې که یې پرضد مقاومت ؤ، ژر به خپل ماموریت ته پایښت ورکړي کنه اوږدمهالي به میشت وي
په بروکسل کې د ناټو غړو هېوادونو د دفاع وزیرانو په غونډه کې د ناټو عمومي منشي ینس سټولتنبرګ وویل، د ناټو سازمان غړي هېوادونه به څو زره روزنیز پوځيان افغانستان ته واستوي. خو په جګړه کې برخه نه اخلي
له دې سره همهاله د برتانیا د دفاع وزیر مایکل فالون وویل چې هېواد به یې افغانستان ته ۱۰۰ نور سرتېري واستوي.
د ناټو عمومي منشي وویل د ناتو ۱۵ غړو هېوادونو افغانستان ته د نورو سرتېرو استول منلي خو معلومه نده چې څومره تعداد به دې هیواد ته ولیږي.
د رسنیو د رپوټونو پر بنسټ اروپا د ۱۲۰۰ او امریکا د ۳۰۰۰ په شاوخوا کې غواړي افغانستان ته اضافي روزنیز عسکر ولیږي چې په هیڅ جګړیز ماموریت کې به ځان نه ښکیلوي.
اوسمهال په افغانستان کې ۱۳۴۵۰ عسکر د ناټو تر چوکاټ لاندې په افغانستان کې میشت دي.
دا په داسې حال کې ده چې د ناټو پوځي سازمان ۱۵ غړو هیوادونو روانه میاشت د بندو دروازو ترشا په یوه ناسته کې پریکړه کړې وه چې دوی افغانستان ته د دوی د ۲۰۱۸م کال د پوځي ماموریت له پاره د سرتیرو او پوځي تجهیزاتو د لیږد له پاره چمتوي دي.
