وسله وال بريد کې د لغمان د عامې روغتيا رئيس ټپي شوی
(کابل ټکی کام ۱۳۹۶چنګاښ ۱۵)
د نامعلومه وسله والو په بريد کې د لغمان د عامې روغتيا رئيس ډاکټر عبدالطيف قيومي ټپی شوی دی.
د لغمان د والي وياند وايي، پر نوموړي باندې نن سهار مهال د نامعلومه موټرسيکل سپرو له لوري د عامې روغتيا مخې ته ډزې وشوې او نوموړی پکې سخت ټپي شو.
نوموړی وايي، ډاکټر لطيف د تداوۍ په موخه جلال اباد ته لېږدول شوی دی.
دغه راز د ياد ولایت مرستیال د لغمان د عامې روغتیا په پخواني رئیس ډاکتر عبدالطیف قیومي نن سهار د ناڅرګندو وسلوالو له لوري د شوي برید د غندنې تر څنګ د نوموړي د عاجلې روغتیا لپاره دوعا وکړه او د يوې غونډې په ترڅ کې ډاکتر عبدالمعروف جلیلي د لغمان د عامې روغتیا د نوي رئیس په توګه وټاکل شو.
دا لومړی ځل دی، چې په ياده سيمه کې د وسله والو له لوري د روغتيا کارکوونکي د بريد هدف ګرځي.
د دغه بريد مسئوليت تر اوسه کومې وسله والې ډلې په غاړه نه دی اخيستی.
-الماس خدرخېل-
