لوګر کې طالبانو ته ۱۲ پوليس تسليم شوي
(کابل ټکی کام ۱۳۹۶چنګاښ ۱۵)
د لوګر ولايت د محمداغې ولسوالۍ اړوند سيمه کې د دولت ۱۲ تنه عسکر له طالبانو سره يوځای شوي دي.
د طالبانو له لوري رسنيو ته په لېږلې خبرپاڼه کې ويل شوي، چې په ياده ولسوالۍ کې دولس تنه، پوليس او اربکيان د دولت له ليکو جلا او دوی ته تسليم شوي دي.
طالبانو د يادو پوليسو نومونه او انځورونه خپاره کړي او ويلي يې دي، چې يادو دولتي سرتيرو ورسره ژمنه کړې، چې له دې ورسوته به د دولت له همکارۍ لاس اخلي.
طالبان د عسکرو او دولتي منسوبينو لپاره د (جلب و جذب او دعوت ارشاد) په نوم ځانګړي دوه کميسيونونه لري، چې وخت ناوخت ورسره د دولتي ادارې سرتيري اړيکې نيسي او د دوی په رابطه د دولت له ليکو جلا او له طالبانو سره يوځای کېږي.
وړمه ورځ هم يوې امنيتي سرچينې خبر ورکړی و، چې د فارياب ولايت په خواجه سبز پوش ولسوالۍ کې د محلي پوليسو (اربکيانو) قوماندان (ګل احمد) سره د خپلو يوولسو ملګرو طالبانو سره يوځای شو او هغوی ته يې ۱۸ ميله وسلې هم له ځان سره وروړي دي.
-الماس خدرخېل-
