روسيې او امريکا په سوريه کې د اوربند هوکړه وکړه
(کابل ټکی کام ۱۳۹۶چنګاښ ۱۷)
د امريکا او روسيې مشرانو د جرمني هامبورګ جي شل غونډه کې د ليدنې پرمهال په سوريه کې د اوربند هوکړه کړې.
د روسيې د بهرنيو چارو وزير سرګي لاورووف او ريکس ټېلرسن چې په دغه ناسته کې يې ګډون درلود ويلي، چې یاده هوکړه به سر له سبا د (يکشنبې) له ورځې پلې کېږي.
ټېلرسن ويلي، چې دا ځل به د نورو پريکړو په توپير سره روسيه د دې هوکړه ليک پلې کېدو ته ژمنه وي.
د اردن حکومت د يادې پريکړې هرکلی کړی او د همکارۍ ژمنه يې کړې.
امريکا او متحدان يې په سوريه کې د داعش پر ضد د رامنځته شوي اييتلافي ځواک- مليشو او روسيه بيا د بشارالاسد د ځواکونو ملاتړ له ځان سره لري.
دا په داسې حال کې ده، چې لس ورځې مخکې هم د عراق، اردن او سوريې د پولو تر منځ په ګډه سيمه کې د اسد د ځواکونو او د داعش ضد اييتلافي ځواکونو تر منځ خونړۍ نښتې او جګړې وشوې.
سوريه کې د امريکا او روسيې د لاسوهنو له امله له تېرو اوو کلونو راهيسې کورنۍ جګړې روانې دي، چې تر ډيره يې مسئوله امريکا او روسيه بلل کېږي.
-الماس خدرخېل-
