(کابل ټکی کام ۱۳۹۶چنګاښ ۲۰)
د تخار ولايت په ینګي قلعه ولسوالۍ کې په يو بازار کې اور لګېدلی، چې له کبله يې پنځوس پلورنځي سوځېدلي دي.
امنیتي مسئولين وايي، چې دغه اور لګېدنه نن سهار مهال د ګاز ډبې د چاودېدو له امله رامنځته شوې ده، چې په پايله کې يې د دغه بازار پنځوس دکانونه وسوځېدل.
د دغه بازار اوسېدونکي وايي، ښايي په اور کې د سوځېدلو دکانونو شميره تر دې هم لوړه شي.
د ۸۰۸ سپين زر زون د پوليسو د قومندانۍ وياند محفوظ الله اکبري وايي، په پېښه کې چاته ځاني زیان نه دی اوښتی، خو هټيوالو ته يې ميليونونه افغانۍ زيان اړولی دی.
سرچينو ويلي، چې له څو ساعتونو وروسته دغه لګېدلی اور د خلکو په هلو ځلو مړ شو.
ډیری وخت خلک شکايت کوي، چې د اور لګېدلو پر مهال ورته د اور وژونکې عمله او اطفايې په وخت نه رسېږي، چې له امله يې خلکو ته مالي او ځاني زيانونه اوړي.
-الماس خدرخېل-
