(کابل ټکی کام ۱۳۹۶چنګاښ ۲۱)
د روسيې د دفاع وزارت ويلي، چې په سوريه کې د دغه هېواد يو لوړپوړی پوځي سلاکار د وسله والو په بريد کې وژل شوی دی.
دفاع وزارت وايي، چې سلاکار نيکولای افاناسوف د سوريې د ځمکنيو قواوو د روزنې دنده په غاړه لرله، چې په همدې موخه دغه هېواد ته تللی و.
د روسيې د دفاع وزارت په خبرپاڼه کې ويل شوي، چې نوموړی د سوريې د حماة په ښار کې د وسله والو د هاوان په بريد کې وژل شوی دی.
روسي سلاکاران ډیری وخت د سوري ځواکونو د روزنې سربيره د جګړې په لیکو کې د جګړې مشري هم پر غاړه لري.
تر دې مخکې هم په سوريه کې د وسله والو بريدونو او چاودنو په ترڅ کې د روسيې يو شمير پوځی سلاکاران وژل شوي دي.
د روسيې د دفاع وزارت په سوريه کې د خپلو وژل شويو پوځيانو او سلاکارانو شمير شاوخوا ۳۰ تنه ښيي، خو ځينو سرچينو ويلي چې د وژل شويو روسي پوځيانو شميره له رسمي شميرو ډيره لوړه ده.
-الماس خدرخېل-
