(کابل ټکی کام ۱۳۹۶چنګاښ ۲۱)
د کابل ولايت به خاکجبار ولسوالۍ کې وسله والو طالبانو د دولتي ځواکونو په لوی پوځي قطار بريد کړی، چې له امله يې ۱۵ تنه عسکر وژل شوي او يو تن طالبانو ژوندی نيولی.
ځايي اوسېدونکي وايي، چې تېر ماسپښين د يادې ولسوالۍ د دروجان په سيمه کې دغه جګړه پيل شوه او د شپې تر ناوخته پورې يې دوام وکړ.
د طالبانو وياند ذبيح الله مجاهد رسنيو ته په لېږلې خبرپاڼه کې ويلي، چې په ټوله جګړه کې دولس ټانګونه او رینجر موټر ويجاړ شوي، درې ټانګونه او څلور رينجر موټر طالبانو روغ نيولي دي.
سرچينې زياتوي، چې دولتي ځواکونو غوښتل د لوګر ازرې ولسوالۍ ته کومک ورسوي، چې د طالبانو له بريد سره مخ شول.
طالبان وايي، په جګړه کې يې پنځلس عسکر وژلي، يو ژوندی نيولی او نور بيرته په کليو کې پياده تښتېدلي دي.
په خبرپاڼه کې راغلي، چې د جګړې پر مهال وسله والو طالبانو يو شمير وسلې او نظامي توکي هم نيولي دي.
خاکجبار ولسوالۍ د مرکز کابل په څو کيلو مترۍ کې پرته ده، چې ډیری سيمې يې له وسله والو طالبانو سره دي او په دغه ولسوالۍ کې پراخ فعاليت کوي.
په عين حال کې د مرکز کابل د سروبي ولسوالۍ د کابل- جلال اباد په لويه لاره په دولتي ځواکونو د بريد خبر ورکړل شوی، چې له امله يې دوه رينجر موټر زيانمن شوي او پنځو عسکرو ته مرګ ژوبله اوښتې ده.
طالبانو د ورستي بريد مسئوليت هم په غاړه اخيستی.
تر اوسه په دې اړه دولتي چارواکو رسنيو ته څه نه دي ويلي، خو يوې سيمه ييزې امنيتي سرچينې د نوم نه ښودلو په شرط د دغو بريدنو تصديق کړی او د تلفاتو په اړه يې نور مالومات نه دي ورکړي.
-الماس خدرخېل-
