ولسمشر غني د سرحداتو او ټرانسپورت وزارتونو لپاره نوماندان معرفي کړل
(کابل ټکی کام ۱۳۹۶زمری ۳)
د ارګ له لوري په خبره شوې خبرپاڼه کې راغلي، چې ولسمشر اشرف غني د دوه بېلابېلو وزارتونو لپاره نوماندان معرفي کړل.
خبرپاڼه زياتوي، چې د ولسمشر د ځانګړي فرمان پر اساس محمد حميد طهماسي د ټرانسپورت وزارت د نوماند وزير او محمد شفيق ګل اغا شيرزی د سرحداتو وزارت د نوماند وزير په توګه معرفي شوي دي.
په پارلماني چارو کې د دولت وزارت ته دنده ورکړل شوې ترڅو دغه دوه تنه د اعتماد رایو د ترلاسه کولو لپاره په رسمي توګه ولسي جرګې ته معرفي کړي.
ګل اغا شيرزی د پخواني ولسمشر حامدکرزي د حکومت پر مهال د ننګرهار او کندهار والي پاتې شوی دی.
تېر کال ولسي جرګې د کافي بودجې د نه مصرف له امله يو شمير وزيران سلب صلاحيت کړل، چې له هماغې راهيسې دغه وزارتونه د سرپرستانو له لوري اداره کېدل.
د نويو وزيرانو د معرفي کېدل په داسې حال کې کېږي، چې اوس مهال ډيری وزارتونه وزيران نه لري او د سرپرستانو له لوري اداره کېږي، چې دې کار په ګډ حکومت د خلکو نيوکې زياتې کړي او د فعالانو او مدني ټولنو غبرګونونه يې راپارولي دي.
