د امريکا سمندري ځواکونو پر ايراني کښتۍ ډزې کړي
(کابل ټکی کام ۱۳۹۶زمری ۴)
په فارس خليج کې د امريکا سمندري ځواکونو وروسته له هغې په ايرانۍ کښتې ډزې وکړې، کله چې د ايران د انقلاب ساتونکي ځواک يوه کښتۍ امريکايي کښتۍ ته د ۱۴۰ مترو په واټن سره نږدې شوه.
د امريکا پوځ په يوه خبرپاڼه کې ويلي، چې دا يې په ايراني کښتۍ د خبرداري ډزې وې.
د پوځ په وينا، ایراني کښتۍ د دوی مخابروي تماس ته ځواب ونه وايه او کله چې ورته نږدې شوه، دوی هم پرې د خبرداري ډزې وکړې او زياتوي چې له هغې وروسته د ايران کښتۍ لرې ولاړه.
د امريکا پوځ، د ايران د انقلاب ساتونکي ګارډ د دغه کښتۍ چلند غير مسلکي او ناسم بللی او زياته کړې يې ده چې د سمندري ګزمې د کښتۍ هارنونه او خبرداري يې له پامه غورځولي او دغه ډول چلند يې د نړيوالو اصولو خلاف بللی.
-الماس خدرخېل-
