د سږني کال د کانکور ازموينې پايلې اعلان شوې

(کابل ټکی کام ۱۳۹۶زمری ۷)

د افغانستان د لوړو زده کړو وزارت له لوري د سږني کال د کانکور ازموينې نتايج اعلان شول.

د دغه وزارت سرپرست عبداللطيف روښان د ۱۳۹۶کال د نتايجو د اعلان پر مهال وويل، چې سږ کال ۱۷۰زره زده کوونکو په دغه ازموينه کې ګډون درلود، چې له دې شمېرې ۱۴۷زره او ۵۳۰ تنه يې بريالي شوي دي.

د هغه په خبره چې په دغه ازموينه کې د بريالي شويو له جملې څخه ۹۹۱۷۲ تنه هلکان او پاتې ۴۸۳۵۸ تنه يې انجونې دي.

نوموړي زیاته کړه، : (له دې شمیرې څخه ۶۰۶۲۹ کسه به په دولتي پوهنتونونو کې جذب شي او ۳۱۶۲۹ کسان به په نیمه لوړو زده کړو پوهنتونونو کې جذب شي او د لوړو زده‌کړو په خصوصي پوهنتونو او مؤسسو کې د شاملېدو لپاره په ټولیزه توګه ۵۵۲۶۶ کسان په پام کې نیول شوي دي).

په دغه کسانو کې رضا رفعت ولد عوض د کانکور عمومي اول نمره چې د ۳۴۴ باندې طب ته بریالی شوی دی.

دغه راز اختر محمد د ۳۴۴ اعشاریه ۲۰ نمبرو په اخېستلو سره دویم او د کابل طبي پوهنتون ته بریالی شوی دی.
د لوړو زده کړو پر انټرنټ پاڼې د ډېرې ګڼې ګوڼې له امله بریالي کسان په اسانۍ سره نه‌شي کولی چې په کانکور کې خپله پایله وګوري خو لوړو زده کړو وزارت وایي چې تر نن ماښامه به ټول خپل نتایج وګوري.

سرپرست وزير روښان وايي، سږ کال يې د کانکور په ازموينه کې د بايوميټريک له سيستم څخه کار اخيستی، نو ځکه سږنې ازموينې په شفافه توګه ترسره شوي دي.

نوموړی وايي، د سږني کال د کانکور په ازموينه کې د دولسم ټولګيو ټولو فارغانو برخه اخيستې وه.

د کانکور نتايج مو په لاندې لينک کې کتلای شئ:

http://www.mohe.gov.af/cancour/ps

-الماس خدرخېل-