(کابل ټکی کام ۱۳۹۶زمری ۱۴)
وسله والو طالبانو تېره ورځ غرمه مهال د صياد ولسوالۍ په دفاعي پوستو ډله ييز بريدونه پيل کړل، چې د ځينو پوستو د نيولو تر څنګ يې ګڼو عسکرو ته مرګ ژوبله واړوله او چارواکي وايي چې د ميرزاولنګ کلی هم د طالبانو لاس ته ورغلی دی.
يو تن سيمه ييز قوماندان محمد انوري رسينو ته ويلي، چې طالبانو يو شمير خلک د دولت سره د همکارۍ په تور وژلي دي او ځينې کورونه يې سوځولي دي.
خو طالبان وايي، چې په دغه سیمه کې د دوی وسله والو په دولتي پوستو او مرکزونه بريدونه کړي، چې ګڼو عسکرو ته يې مرګ ژوبله اړولې ده.
طالبانو تېره ورځ د صياد ولسوالۍ په میزاولنګ کلي کې د دولتي ځواکونو قوې سره د درنې جګړې خبر ورکړی و.
د طالبانو وياند قاري يوسف احمدي وايي، دسرپل صیاد کي دملکي خلکو کورونه ندي سوځول شوي بلکې د دولتي ځواکونو څو مرکزونه په جګړه کې تخریب شوي چې دوی ورکې پوستې جوړې کړې وې.
دا په داسې حال کې ده، چې پرون د سرپل د پوليسو وياند ذبيح الله اماني د يو شمير پوليسو د وژل کېدو او ځينې نورو د کلابندۍ راپور ورکړی و.
نوموړي ويلي و، چې که ژرترژره تازه دمي ځواکونه سيمې ته ونه رسېږي نو ياده سيمه به د سقوط سره مخ شي.
-الماس خدرخېل-
