(کابل ټکی کام ۱۳۹۶زمری ۱۵)
د هرات ښار اوسېدونکي وايي، چې يو شمير امنيتي کسان د نشه يي توکو له پلورونکو، پېرونکو سره لاس لري او په خبره يې چې د امنيتي ځواکونو له همغږۍ پرته د نشه يي توکو پلورونکي نه شي کولی چې په بازار کې دغه مواد خرڅ کړي.
د دغه ښار يو تن اوسېدونکی حسين چې خپله هم په نشې روږدی دی وايي، چې په هرات کې پوليس له خرڅوونکو سره پوره همکاري کوي او نشه يي مواد پر روږدو کسانو پلوري.
نوموړی وايي، کله مو چې نشه يي موادو ته اړتيا پېښه شي، نو خلک يې معلوم دي، يا ورته ټليفون وکړو او يا هغه معلوم ځای ته ورشو او د پيسو په اندازه نشه يي توکي ترې وپلورو.
هغه زياتوي، چې ډیری وخت هغه ځای کې چې نشه يي توکي پکې پلورل کېږي، پوليس هم ناست وي هيڅ نه وايي او يواځې څار کوي.
د ورکړل شويو مالوماتو پر اساس په هرات کې اوس مهال شاوخوا ۷۰۰۰۰ زره کسان په نشه يي توکو روږدي دي چې ورسره د نشه يي توکو د پلورلو بازار هم ګرم دی او هره ورځ د نشه یانو تعداد زياتېږي.
د هرات ډيری اوسېدونکي هم وايي، چې د نشه يي موادو د خرڅوونکو ځايونه ښکاره دي او په ځای د دې چې پوليس يې مخنیوی وکړي، امنيتي ځواکونه يې په خرڅون کې ورسره همکاري کوي.
په ورته وخت کې د هرات د ولايتي شورا غړی سيد عظيم کبرزاني وايي، چې په حکومت کې د فساد د موجوديت سربيره داسې کسان شته چې د نشه يي توکو د پلورونکو ملاتړ له ځان سره لري.
تر دې مخکې هم د کابل په ګډون د هېواد له ځينو لويو ښارونو څخه راپورونه ورکول شوي، چې دنشه يي توکو په پېر او پلور قاچاق کې يو شمېر دولتي کسان لاس لري او ځينې پوليس هم په نشه يي توکو روږدي دي، چې ورسره د نشيانو شميره ورځ تربلې زیاتېږي او حساب يې آن تر سل زرو اوړي.
-الماس خدرخېل-
