(کابل ټکی کام ۱۳۹۶زمری۱۵ فرید افغان )
د افغانستان د ملي دفاع وزارت یوځل بیا له امریکا غوښتي چې د طالبانو پرضد دې خپله پالیسي هرڅومره ژر چې وی نهایي او ابلاغ کړی.
د دفاع وزارت ویاند دولت وزیري ویلي چې امریکایي مشران دې د پالیسۍ په جوړولو کې بېړه وکړي، ځکه ددې کار ځنډ د مخالفینو د قوت لامل ګرځي.
د نوموړي په وینا د امریکایي مشرانو د ستراتیژۍ نه اعلان د بهرنیانو او افغان عسکرو په مرګ ژوبله کې بې مخینې اثر راوستی دی.
دفاع وزارت له امریکا څخه غوښتي، چې امریکا دې په نوې ستراتيژۍ کې د طالبانو پرضد جګړه پراخه او ګړندۍ کړي کنه نو سیمې به لا پسې سقوط وکړي.
وزیري ویلي امریکا دې د سولې لارې هم پرانیستې پرېږدي تر څو مخالفین دجګړې په زور تسلیمي ته اړ شي.
وزیري له امریکا غوښتي چې امریکا دې د سیمې په هیوادونو او پاکستان باندې هم فشار ته ادامه ورکړي.
د دفاع وزارت ویاند ویلي چې د دوی اوس ټولې هیلې د نوي امریکایي ولسمشر تر پالیسۍ پورې تړلې او ټول امیدونه یې د هغه هیواد نظامي مرستو ته دي.
د دفاع وزارت اندیښنې داسې مهال کې مخ پر زیاتیدو دي چې د امریکا په کانګرس کې د افغانستان په اړه پراخ اختلافات موجود دي، او د امریکایي مطبوعاتو له قوله ټرمپ غواړي چې دې جګړې ته نور دپای ټکی کیږدي او ښایي دافغانستان امنیتي چارې شخصي امنیتي کمپنیو او کرایي جګړه مارو ډلو ته وسپاري.
شنونکي وایي چې د دفاع وزارت له یوې خوا د امریکا په نظامي مرستو کې سترګې ګنډلې دي او له بلې خوا د جګړیز زور له لارې طالبانو ته د تسلیمۍ اخطارونه ورکوي چې دا هرڅه د کامل محکومیت په معنا دي.
