(کابل ټکی کام ۱۳۹۶زمری ۲۱)
د افغانستان پخواني ولسمشر حامدکري د ننګرهار په هسکه مېنه کې د بهرنيو ځواکونو په هوايي بريد کې د ولسي خلکو وژل غندلي او په دې اړه يې خواشيني او اندېښنه څرګنده کړې ده.
نوموړي په خپله رسمي فسبوک پاڼه په خپره کړې اعلاميه کې له تروريزم سره د جګړې تر نامه لاندې د افغانانو پر کليو کورونو بریدونه د ملکي خلکو وژنه د بشر ضد کړنې او د نړيوالو اصولو خلاف عمل بللی.
په اعلاميه کې د امريکا له متحده ايالاتو څخه غوښتنه شوې، چې د تروريزم سره د جګړې په نامه له افغان وژنې دې لاس واخلي.
اعلاميه زياتوي، چې (پخوانی جمهور رئیس د لوی خدای له درباره د دغې غمجنې پېښې شهیدانو ته د جنت، کورنیو ته یې د جمیل صبر او ټپیانو ته د سملاسي روغتیا استدعا کوي).
تېره ورځ د هسکې مېنې ولسوال سازولي شینواري رسنيو ته وويل چې وړمه ورځ د يادې ولسوالۍ په کوز او خرکي کليو کې بهرنيو ځواکونو هوايي بريدونه وکړل، چې په ترڅ کې يې شپاړلس ملکي کسان ووژل شول.
دا په داسې حال کې ده، چې پرون ماښام هم د دولتي ځواکونو د هوان مرمۍ د لګېدو له امله د فارياب په دولت اباد ولسوالۍ کې د يوې کورنۍ ۱۳ غړي چې ښځې او ماشومان هم پکې دي ووژل شول.
