فرانسه کې يو کس څوارلس تنه په موټر وهلي- مرګ ژوبله يې اړولې
(کابل ټکی کام ۱۳۹۶زمری ۲۴): په فرانسه کې يو کس څوارلس تنه په موټر وهلي، چې په پايله کې کې يوه نجلۍ وژل شوې او ۱۳ تنه نور ټپيان دي.
د دغه هېواد امنيتي چارواکي وايي، پېښه په پلازمېنه پاريس کې هغه مهال رامنځته شوه، کله چې يو کس خپل موټر د سين ايت مارن په سيمه کې د پيزا په يو هوټل وروست او څوارلس تنو ته يې مرګ ژوبله واړوله.
روغتيايي مسئولين وايي، په پېښه کې يوه نجلۍ وژل شوې او د څوارلس تنو ټپيانو څخه يې د څلورو حالت نازک دی.
د فرانسې د کورنيو چارو وزارت ويلي، ښايي دغه پېښه په قصدي ډول ترسره شوي وي، ځکه په وينا يې چې په سيمه کې د بريک نيولو نښې نه معلومېږي.
پوليس وايي، موټر چلوونکی يې نيولی او د پېښې په اړه ترې څېړنې پيل شوي دي.
تر اوسه د بريد انګيزه نه ده معلومه، خو د پوليسو په خبره چې برید کوونکي څه موده مخکې د ځانوژنې هڅه کړې وه.
تر دې مخکې هم په فرانسه کې د موټرچلوونکو له لوري په عامو خلکو او پوليسو باندې موټر خيژول شوی، چې لسګونه کسانو ته پکې مرګ ژوبله اوښتې ده.
