(کابل ټکی کام ۱۳۹۶ زمری ۲۴ فریدافغان)
د رویټرز خبري اژانس خبر ورکړی چې د شمالي کوریا ولسمشر کیم جونګ اون د پوځ لخوا په ګوام د بالستیک توغندیو د برید کولو اړوند دپوځ لخوا وړاندې شوی پلان منلی دی
کیم ویلي چې په ګوام د برید نه مخکې به د امریکا فعالیتونه د نږدې نه تعقیب کړي.
باید وویل شي چې څو ورځې وړاندې د دې هیواد پوځ وویل چې د روانې میلادي میاشتې تر ۱۶ پورې چمتو دي چې په ګوام کې د امریکایانو پوځي اډه په نښه کړي خو د دې کار لپاره د خپل ولسمشر وروستي امرته منتظر دي.
د شمالي کوریا ولسمشر تیره ورځ د پوځ وړاندیز منلی او که د پوځ ژمنه رښتیاشي نو د چهارشنبې په ورځ به یاده پوځي اډه د برید نښه ګرځي.
بلخوا د امریکا د متحده ایالاتو د دفاع وزیر جیم متیس خبرداری ورکړی دی چې د شمالي کوریا لخوا د هر ډول برید وروسته به په ډیره چټکه توګه جګړه پيل شي.
نوموړي تیره ورځ وروسته له هغه چې روسیې د دواړو هیوادونو د جګړې په احتمال اندیښنه څرګنده کړه، وویل چې که شمالي کوریا اقدام ونکړي ښایي د دواړو هیوادونو ترمنځ جګړه ژر پیل نشي.
د یادونې وړ ده چې امریکا د ګوام په سیمه کې لویه اډه او پراخ پوځي حضور لري چې تیره اونۍ د شمالي کوریا له ګواښ وروسته امریکایي دفاع وزیر هم له یادې اډې څخه لیدنه کړې وه.
