سرليکنه
د څه مودې راپدېخوا چې په کندز، بغلان، سرپل او فارياب کې د طالب وسله والو بريدونه پر حکومتي ځواکونو زيات شوي دي او د هېواد د ٢٣ ولاياتو د جگړو څخه په ١٤ ولاياتو کې جگړو زور موندلى دى، دفاع او د کورنيو چارو وزارتونه يې وارخطا کړي دي.
تېره اونۍ په يوه مطبوعاتي غونډه کې د دفاع وزارت وياند وويل چې زمونږ ځواکونه د هېواد د دفاع وړتيا لري او دا د دښمن تبليغات دي چې ملي اردو د وسله والو طالبانو په وړاندې د جگړې توان نه لري. خو دا دى ثابته شوه چې د فارياب ولايت د غورماچ ولسوالي يو ځل بيا طالبانو د سختو جگړو او محاصرې وروسته ونيوله چې د دفاع وزارت وروسته له دې د رسنيو په وړاندې چوپ پاتې دي. په هېواد کې روانو حالاتو ته په کتو او په ٢٣ ولاياتو کې د جگړې دوام دا ثابتوي چې د حکومت پوليس او پوځ د طالب وسله والو په وړاندې مقاومت نه شي کولاى.
اوس حکومتي چارواکي په دې اندېښنه کې دي چې غورماچ د طالبانو لخوا نيول شوې ولسوالي د فارياب او بادغيس ولايتونو ترمنځ د پل حيثيت لري. د غورماچ سقوط به د دواړو ولاياتو فارياب او بادغيس سقوط وگرځي. ځکه همدا اوس طالب وسله وال د فارياب او بادغيس ولاياتو د ځينې سيمو چې دواړه ولايات سره نښلوي پر هغې سيمو د عملياتو لپاره آمادگي نيسي او امکان لري، د غورماچ له ولسوالۍ جگړه په نږدې کې نورو سيمو ته وغځېږي.
که څه هم دواړو ولاياتو کې چارواکي له مرکزه توقع نه لري چې د نظامي تجهيزاتو مرسته به ورسره وکړي؛ ځکه د غورماچ ولسوالي د مرکز د نه توجه له امله د ولايتي چارواکو په وينا له لاسه يې وتلې ده چې که طالبان د باغيس او فارياب ولاياتو د نيولو لپاره عمليات پيل کړي، پايله به يې د غورماچ ولسوالۍ په څېر شي. د همدې ويرې له امله د فارياب ولايت له مرکز او غورماچ ولسوالۍ نږدې نورو ولسواليو څخه ملکي وگړي نورو سيمو ته په کډو کولو ليدل شوي دي چې امکان لري د غورماچ جگړه نورو ولسواليو ته هم لمن پراخه کړي.
په افغانستان کې د ناټو عمومي قوماندان جنرال نيکولسن وايي، امريکا په افغانستان کې تر ټولو په اوږده جگړه کې راگېره ده چې له دې جگړې څخه به امريکا په ډېرو تاوانونو زغملو ووځي. همدا ډول دفاع وزارت سره د گواښونو چې طالب وسله والو ته يې کوي د غورماچ ولسوالۍ او د هېواد له ٢٣ ولاياتو څخه د فارياب او کندز جگړې تر ټولو ا وږدې جگړې دي چې کندز او د فارياب غورماچ ولسوالي څو واره د طالب ولسواليو او حکومتي ځواکونو ترمنځ نيول شوي دي.
اوس د بادغيس او فارياب دواړو ولاياتو نظامي چارواکو له مرکزه څڅه غوښتي چې پر ولاياتو يې د طالبانو د جگړې د پيل څخه د مخه اکمال کړى او که نه برخليک به يې د غورماچ په شان وي. بادغيس او فارياب دواړو ولايات د امکاني سقوط سره مخ دي.
