(کابل ټکی کام ۱۳۹۶زمری ۲۵): وسله والو طالبانو د کندهار ولايت په معروف ولسوالۍ کې د دولتي ځواکونو په پوسته بريد کړی، چې په ترڅ کې يې پنځلس عسکر وژل شوي دي.
يوې باوري سرچينې کابل ټکی کام ته وويل، چې پېښه د يادې ولسوالۍ مربوط د کوتکي په سيمه کې رامنځته شوې ده.
د سرچينې په وينا، په دغه بريد کې له لسو زيات عسکر وژل شوي او يو شمیر نور وسله والو له ځان سره ژوندي بيولي دي.
له بله پلوه طالبانو د دغه بريد مسئوليت په غاړه اخيتسی او کابل ټکی کام ته يې په رالېږلې خبرپاڼه کې ويلي، چې د دوی پلويانو تېره شپه په ياده سيمه کې په پوسته بريد وکړ، چې د څو ساعتونو په پايله کې يې ونيوله.
طالبان وايي، په دغه جګړه کې يې تر ۱۵ پورې عسکر وژلي او زياتوي چې جسدونه يې لا هم په پوسته کې پراته دي.
په خبرپاڼه کې راغلي، چې طالبانو دوه تنه عسکر ژوندي نيولي او د په پوسته کې ولاړ د هغوی درې رينجر موټر يې هم سوځولي دي.
طالبانو ويلي، له يادې پوستې څخه يې دوه ټانګونه ۱۸ ميله سپکې او درنې وسلې، دغه راز په زرګونه فيره ميرمۍ هم ترلاسه کړي دي.
تر اوسه چارواکو دولتي ځواکونو ته د اوښتو تلفاتو په اړه رسنيو ته څه نه دي ويلي، خو طالبان وايي چې په دغه جګړه کې د دوی دوه ملګري ټپيان شوي او يو بل وژل شوی دی.
