(کابل ټکی کام ۱۳۹۶ زمری ۲۷ فرید افغان)
راپورونه وایي چې د امریکا ولسمشر ټرمپ پرون سهار د خپل ټویټر حساب له لارې د امازون شرکت په اړه یو پیغام خپور کړ چې نوموړي پيغام د اسهامو په بازار کې د امازون شرکت سهامي حصو بیه په چټکه توګه راوغورځوله.
د یاد شرکت او دټرمپ ترمنځ رقابتي شخړه د ۲۰۱۵ کال راهیسې روانه ده او ورځ تربلې پیچلې کیږي.
امریکایي ولسمشر تیره ورځ په یوه ټویټ کې لیکلي ؤ چې د امازون شرکت د امریکا هټۍوالو او سوداګرو ته چې په خپل وخت سره او په منظمه توګه خپله مالیه ورکوي ستر ضرر رسولی او د هغوی د پرمختګ مخه یې هم ډب کړې ده .
امازون شرکت ویلي چې د ټرمپ دې پیغام په څو دقیقو کې دننه ورته ۶ میلیارده ډالره تاوان رسولی دی
باید وویل شي چې د ټرمپ اود امازون دشرکت مشر جیف ترمنځ په ۲۰۱۵ کال کې وروسته تر هغه رقابتي شخړه پیل شوه کله چې یاد شرکت د مخالفو خبرونو خپروونکې د واشنګټن پوست ورځپاڼه واخیستله نوموړې ورځپاڼې د امریکا په انتخاباتي منډو ترړو کې د ټرمپ په ضد له مبالغې ډک منفي خبرونه نشرول.
د یادونې وړ ده چې د امازون شرکت په امریکا او نړۍ کې د انلاین سوداګرۍ تر ټولو لوی او مشهور شرکت دی.
ټرمپ د امریکا په سطحه د تیلو او نورو توکو ستر سوداګریز شرکت لري، او اوس هڅه کوي ترڅو د خپلو واکونو له لارې خپل ټول هغه مخالفین وځپي چې نوموړي ته په سوداګریزو موخو کې خنډ ؤ.
