(کابل ټکی کام ۱۳۹۶ زمری ۲۹ فریدافغان)
نن له غرمې مخکې په یو لړ مراسمو کې چې د خاصو عملیاتو فرقه په کې قول اردو ته لوړه شوه اشرف غني او امریکایي جنرال نیکولسن د خپلو بریالیتوبونو ترڅنګ طالبان وګواښل چې باید د تسلیمۍ لار غوره کړي، کنه نو په وینا یې چې وبه وژل شي.
په غونډه کې د ملي دفاع سرپرست وزیر طارق شاه بهرامي وویل چې ملي دفاع وزارت به د دغه قول اردو له منسوبینو څخه په جدیت ملاتړ وکړي، او د فرقې عسکرو ته یې په خطاب کې و ویل،چې له دغې ارتقا سره به ستاسو مسوولیت څو برابره شي، زه له تاسې غواړم چې د امریکایي ملاتړو ترڅنګ په هماغه شهامت او میړانې د خپل هېواد او د خلکو د دفاع لپاره چمتو اوسئ او زیاتې لاسته راوړنې ولرئ.
ورپسې د امریکایي ځواکونو عمومي قوماندان جنرال جان نیکولسن د دغه قول اردو منسوبینو ته د مبارکۍ د ورکولو تر څنګ وویل، تاسې د دې خاورې ریښتني بچیان یاست چې زموږ د ځواکونو تر څنګ د خپلې خاورې له لوېشت لوېشت څخه دفاع کوئ
امریکایي قوماندان زیاته کړه: طالبان ستاسو پر وړاندې بل انتخاب نه لري، یا باید تسلیم شي او یا دې ستاسو کومانډویانو لهخوا نابود شي.
له نیکولسن وروسته اشرف غني ګډونوالو ته وینا وکړه او زیاته یې کړه چې تاسې د افغانستان کومانډویان، د اساسي قانون او د هېواد د ملي نوامیسو ساتوونکي یاست. تاسې شاته تګ نه دی کړی، بلکې طالبان مو شاته تګ ته مجبور کړی دی.
اشرف غني هم د نیکولسن خبره تکرار کړه او زیاته یې کړه طالبانو ته مو پيغام دا دی چې یا تسلیم شئ یا به مو د کومانډو خاص قطعات تسلیمۍ ته مجبوروي.
باید وویل شي چې د امریکایي تاړاک وروسته په لسګونو ځله افغان او امریکایي چارواکو په ګډه طالبان په مرګ ګواښلي، خو طالبانو په هرځلي اعلامیو کې ویلي چې د امریکایانو او دهغوی ملاتړو عسکرو پرضد او د هیواد دځمکنی بشپړتیا په خاطر هرې ځاني او مالي قرباني ته چمتو دي او پدې لاره کې خپله سوبه غزا، او وژل شهادت بولي.
اشرف غني د عسکرو د مرال لوړولو پخاطر وویل چې خلک هم درسره ولاړ دي خو ترټولو ستره خبره داده چې تاسې د وسلهوالو ځواکونو د اعلی سرقوماندان(اشرف غني) بشپړ ملاتړ هم له ځان سره لرئ.
ښاغلي غني د طالبانو پر وړاندې د جنرال نکولسن له ژمنې څخه مننه وکړه، وې ویل: زموږ برخلیک له نړۍ سره غوټه شوی دی،
د نوموړي په وینا چې دوی د افغانستان نه؛ بلکه د بینالمللي ارزښتونو څخه د ساتلو په لومړۍ کرښه کې دي او له همدې امله د نړيوالې ټولنې ملاتړ هم له ځان سره لري.
. هغه زیاته کړه: چې د جګړه بریالیتوب له دې څخه ورڅرګندیږي چې پخوا یې ۶ ساعته مګر اوس دوه ساعته په جګړییزو مسایلو تمرکز کوي.
نیکولسن او غني په ګډه تورن جنرال بسم الله وزیري د قوماندان په توګه معرفي کړ.
اشرف غني داسې مهال د بهرنیانو په مټ د خپلې بریا او طالبانو ته د تسلیمۍ خبرداری ورکوي چې د شمیرو ترمخه دا مهال هم د افغانستان تر ۵۰% نیمایي خاوره باندې طالب ځواکونه واکمني لري.
