(کابل ټکی کام ۱۳۹۶زمری ۳۱): امريکايي چارواکي وايي، چې دغه هېواد ته ورغلي درې تنه افغان نظاميان چې د محبس کارکوونکي و لادرکه شوي دي.
د ورکړل شويو راپورونو له مخې، دغه درې تنه افغانان د امريکا کولورادو ايالت ته د رونې لپاره تللي و.
يادې سرچينې ويلي، چې دغه درې تنه افغانان چې د يو تنظيم شوي سفر په لړ کې ورغلي و، د روانې اوونۍ د شنبې د ورځې له ماښام وروسته خپل استوګنځي ته نه دي ستانه شوي.
د کولورادو ايالت د اصلاحاتو د ادارې وياند مارک فيربيرن د ورک شويو افغانانو د وضعيت په اړه اندېښنه څرګنده کړې ده.
ځينو سرچينو ويلي، چې له تېرو دوو کلونو راهيسې د لوړو زده کړو، پوځي زده کړو او نورو برخو کې د روزنې لپاره لسګونه افغانان چې امريکا تللي دي، بيرته نه دي راستانه شوي او همالته يې په امريکا يا کاناډا کې د پناه غوښتنه کړې ده.
د مالوماتو له مخې، د هغه کسانو شمير چې په امريکا کې يې د تيښتې او پاتې کېدو هڅه کړې، سلګونه کسانو ته رسېږي.
