(کابل ټکی کام ۱۳۹۶ وږی۱ فرید افغان)
د امریکا د بهرنیو چارو وزیر ریک ټیلرسن د ټرمپ خبرې بیځایه بللې او ویلي یې چې په افغان جګړه کې د بریا دعوه نه امریکا، او نه هم وسلوال طالبان کولی شي.
ټيلرسن واشنګټن کې خبريالانو ته وويل امريکا ښايي له پوځي پلوه پرطالبانو برى ترلاسه نه کړي ، خو دايې هم وويل چې طالبان يې هم نه شي ګټلى.
امریکایي جمهور رئیس ټرمپ تیره ورځ په خپله وینا کي څلور ځله د بري او اووه ځله دښمن ته د ماتي ورکولو خبره یاده کړه. مګر دا یې واضحه نه کړه چي بری به څرنګه وي
له دې څخه څو شیبې وروسته طالبانو سملاسي غبرګون وښوود او ژمنه یې وکړه چې تر هغو به خپلې جهادي مبارزې دوام ورکوي ترڅو یې چې امریکایانو ته په بشپړ ډول ماتې نه وي ورکړې.
خارجه وزیر ویلي؛ د امریکایي مشر دونالد ترامپ د بریا دعوه کول له حماقت ډکه ده ځکه چې په وینا یې په تیرو ۱۶ کالونو کې د یادې جګړې د بري کوم څرک ونه لګید، تر دې وروسته هم ناشونی دی.
باید وویل شي چې اوسمهال زرګونه امریکایي عسکر د افغان ځواکونو سره د طالبانو پر وړاندې په مخامخ جګړو کې جنګیږي او د ټرمپ له ستراتیژي سره سم به امریکایي ځواکونه نور هم د طالبانو پر وړاندې هوایي او ځمکني عملیات ګړندي کړي خو طالبانو ویلي چې طالبان به په پوره متانت سره خپلې مبارزې ته دوام ورکوي او لا یې هم زرګونه ځوانان د فدایي بریدونو لپاره نوبت ته ناست دي.
د امریکا د نوې ستراتیژي په هکله غبرګونونه په پراخیدو دي، د ګډحکومت مشرانو ترې هرکلی کړی، برتانیا او اروپایي هیوادونو ستایلی خو امریکایي سیاستوالو بیا یاده پریکړه له حماقت ډکه بللې او په وینا یې چې امریکا له ۷ میاشتو جنجالو اختلافاتو وروسته ایله د یوې ناکامې تګلارې په جوړلو بریالي شول.
