(کابل ټکی کام ۱۳۹۶وږی۳ فرید افغان)
د پاکستان د نوي لمړي وزیر په مشرۍ د دې هیواد استخباراتي مشرانو تیره ورځ په یوه ناسته کې چې ۵ ساعته یې دوام وکړ د امریکا لخوا لګول شوي هغه تورونه چې وایي دې هیواد طالبانو ته چې په افغانستان کې پر امریکایي ځواکونو مرګوني بریدونه کوي، پناه ورکړې ده، رد کړل او هغه یې بې اساسه وبلل.
د غونډې ګډونوالو همداراز ويلي، د افغانستان شخړه د جګړې له لارې نه، بلکې د خبرو اترو له لارې هوارېدلی شي.
پاکستاني مشرانو ویلي چې امریکا دې د افغانستان جګړه په پاکستان کې نکوي
د پاکستان د بهرنیو چارو وزیر خواجه آصف په افغانستان کې د هند درول په هکله خواشیني وښووده او په خبره یې چې
“هند د جنوب اسیا په سیمه کې امنیت نشي ټېنګولی. هغه د خپلو ټولو گاونډیو سره جنجالي اړیکې لري او داسې پالیسي پر مخ بیایي چې پاکستان د ختیځ او لویدیځ له لورې بې ثباته کړي”.
پاکستان یو ځل بیا تور پورې کړ چې د پاکستان ضد وسلوالې ډلې د افغانستان په ختیځو سیمو کې پټنځایونه لري او غوښتنه يې کړې، چې هلته باید پوځي عملیات ترسره شي.
پاکستان د ټرمپ د ادارې هغه خبره هم رد کړې چې ویلي و، له پاکستان سره يې د میلیاردونو ډالرو مرسته د ترهګرۍ ضد جګړې لپاره کړې دوی ویلي چې یاده مرسته نه وه، بلکې له ۲۰۰۱ عیسوي کال راهیسې يې امریکا ته د وسلوالو پر ضد جګړه کې د خپلې خاورې او هوايي حریم کارولو اجازه ورکړې وه او دغه پيسې ورته د دغې کړنې په بدل کې ورکړل شوې دي
پاکستان ویلي چې د افغان حکومت او ا مریکا سره نږدې اړیکو ته ژمن دي.
باید وویل شي چې د تیرو څو کلونو راپدیخوا طالبان د افغانستان په داخل کې خپل ټول خوندي مراکز لري، خو طالبان وایي چې د سیمې له ټولو هیوادونو سره مشروع سیاسي اړیکې لري او دا پدې معنا نده چې ګواکې دوی دهغو لخوا مرستې ترلاسه کوي.
طالبانو په ځلونو ویلي چې دوی تر اوسه هیڅ هیواد ته هم د مرستې لاس ندی ور اوږد کړی او د افغان ولس د پراخې همکارۍ له کبله د هیواد په داخل کې فعال مرکز او خوندي امن ځایونه لري
د یادونې وړ ده چې د امریکایي ولسمشر د ستراتیژی تر اعلان دوه ورځې مخکې د امریکا یو لوړپوړی پلاوی اسلام آباد ته رسیدلی و او هلته یې د قبایلي سیمو څخه هم لیدنه کړې وه چې پاکستان یې د وسلوالو پرضد په عملیاتو کې ستایلی و
