’د غزني ۷ ولسوالۍ سقوط ته نږدې دي‘
د غزني ولایت امنیتي چارواکي وايي د دې ولایت اووه ولسوالۍ د سقوط له ګواښ سره مخ دي.
د ملي اردو درېیمې لوا قومندان، نظام الدین خنجر رسنیو ته ویلي چې د غزني د اندړو، خوګیاڼي، اجرستان، ده یک، ګېرو، قره باغ او آب بند ولسوالۍ له جدي امنیتي ستونزو سره مخ دي او ورځ په ورځ د سقوط خوا ته نږدې کېږي.
د خنجر په خبره، چې له سختو حملو سره بیا هم طالبان نه دي توانېدلي چې د یوې ولسوالۍ مرکز هم له دولتي سرتېرو ونیسي.
نظام الدین خنجر دا څرګندونې داسې مهال کوي چې همدا تېره ورځ وسله والو طالبانو د غزني ولایت زنه خان ولسوالي ونیوله.
طالبانو د زنخان ولسوالۍ مرکز او څلور پوستې نيولي
پکتیکا: طالبانو د ګومل ولسوالی مرکز او ټولې پوستې ونیولې
غزني هغه ولایت دی چې ورځ په ورځ په کې د طالبانو نفوذ زیاتېږي او سیمې له دولتي سرتېرو نیسي.
دا مهال د زنه خان، خوګیاڼي، رشیدان او واغظ ولسوالۍ په بشپړه توګه د طالبانو په لاس کې دي او مرکزونه يې د غزني ښار ته رالېږدول شوي دي.
همداراز د اندړو، قره باغ، ګېرو، ګیلان، اب بند، اجرستان او ده یک ولسوالیو کې دولت یوازې د ولسوالۍ تر مرکزونو او پوستو پورې محدود دی او له امنیتي برخې پرته هیڅ ملکي خدمات نه لري.
