(کابل ټکی کام ۱۳۹۶وږی ۶): د افغانستان د پخواني ولسمشر حامد کرزي د دورې پر مهال د ملي امنیت سلاکار رنګين دادفتر سپنتا وايي، چې اوسنی حکومت د ولس په غولولو غواړي د خپل واک موده وغځوي او په وينا يې چې د ملي وحدت حکومت واک انحصار کړی دی.
نوموړي ويلي، چې د ګډ حکومت مشروعيت له ډېرو پوښتنو، ننګونو سره مخ دی او په خبره يې چې اوس د دې وخت رارسېدلی چې بايد اوسنی نظام په سوله ييزه توګه انتقال شي.
ډاکټر سپنتا دغه راز ويلي، چې په حکومت جوړونه کې ډیری پريکړې بايد د هېواد په داخل کې وشي.
د هغه په وینا، چې د افغانستان ډیری مهمې او سترې پريکړې د بهرنيانو په لاس کې دي او هغوی يې کوي.
نوموړی وايي ترهغو چې حکومت له ولس نه جوړ نه شي او خپلواک نه شي، په مهمو پريکړو کې د بهرنيانو اغيز راکم نه شي، نو هيڅکله به په هېواد کې يو خپلواک او ولسواک حکومت رامنځته نه شي.
