(کابل ټکی کام ۱۳۹۶ وږی ۱۶ فرید افغان)
راپورونه وایي چې د ترکي ولسمشر رجب طیب اردوغان میرمن امینه اردوغان د روهينګيا د مسلمانانو سره د مرستې په موخه بنګله دېش ته رسېدلې ده.
د اناضول خبري اژانس د راپور ترمخه امینه به د بنګلادیش د کوکس له بازار څخه چې د برما د مسلمانانو لوی پنډغالی پکې دی لیدنه وکړي.
ترکي رسنۍ وایي چې د مېرمن اردوغان سره پدې سفر كې د نوموړې زوى بلال اردوغان، د كورنۍ او ټولنيزو سياستونو وزيره فاطمه بيتول سايان كايا او د عدالت او پراختيا د ګوند بشري حقونو په چارو كې مرستيال روضه كواكچي او د یو شمیر مرستندویه ډلو غړی له نوموړې سره په پدې سفر کې ملتیا کوي.
میرمن اردوغان غواړي د برما دځپل شویو مسلمانانو غږ نړیوالو ته ورسوي او پدې توګه د دوی محکومیت خلکو ته بربنډ کړي ترڅو نړیوال وهڅول شي د برما له لږکیو مسلمانو پرګنو سره مرستې وکړي.
امينه اردوغان به د روهينګيا د مسلمانانو سره د مخامخ خبرو په ترڅ كې د روان ناورين په اړه معلومات ترلاسه كړي او د تركيې د مرستو د تنظيم او همغږۍ په برخه كې عملي ګامونه پورته كړي.
باید وویل شي چې تیره ورځ ترکیې اعلان وکړ چې د ۱۰۰۰ ټنو په شاخوا کې بشري مرستې یې د برما د راخین ځپل شوي ښارګوټي ته استولې دي
