(کابل ټکی کام ۱۳۹۶وږی ۱۸): د راپورونو له مخې وسله والو طالبانو د بدخشان ولايت مرکز فيض اباد کې د دولتي ځواکونو په پوستو بريدونه پيل کړي دي.
يوې امنيتي سرچينې کابل ټکی کام ته وويل، چې وسله والو طالبانو د اتمې ناحيې مربوط د ده بالا په سيمه کې د امنيتي ځواکونو په پوستو درنه جګړه پيل کړې، چې لا هم روانه ده.
د سرچينې په وينا، په دغه جګړه کې مرګ ژوبله اوښتې خو د دقيقو معلوماتو په اړه يې راپور نه دی ورکړل شوی.
د وسله والو طالبانو وياند قاري يوسف احمدي وايي، په یاده جګړه کې يې ګڼو عسکرو ته مرګ ژوبله اړولې ده او په وينا يې چې د دوی وسله والو په ګڼو امنیتي پوستو بريدونه پيل کړي دي چې لا هم ادامه لري.
تر اوسه په دې اړه ولايتي چارواکو رسنيو ته څه نه دي ويلي.
