(کابل ټکی کام ۱۳۹۶وږی ۱۹): د سوريې رسنيو راپور ورکړی، چې د دغه هېواد ځواکونو د ديرالزور هوايي ډګر له داعش وسله والې ډلې څخه په بشپړه توګه نيولی دی.
د ديرالزور ولايت هوايي ډګر شاوخوا درې کاله وړاندې د داعش وسله والې ډلې د سختو جګړو په ترڅ کې له دولتي ځواکونو نيولی و.
دا په داسې حال کې ده، چې څو ورځې وړاندې سوري چارواکو ويلي و چې ديرالزور ښار يې په مکمله توګه له داعشي وسله والو نيولی دی، خو په لندن کې د سوريې د بشري حقونو د څار ډله وايي اوس هم د دغه ښار په ځينو سيمو کې داعشي وسله والې ډلې په فعاليت او دولتي ځواکونو سره په جګړه بوختې دي.
په ديرالزور کې د داعش وسله والې ډلې پرضد روسي هوايي او ځمکني ځواکونه هم برخه لري.
په عين حال کې سوري چارواکو د دغه ولايت په شمالي سيمو کې د داعش ډلې پرخلاف د نويو عملياتو د پيل اعلان کړی.
ويل کېږي، په ديرالزور ښار کې هم څه باندې نوي زره کسان په جګړو کې رايسار دي، چې د دغه کلابندو کسانو د وضعيت په اړه ملګرو ملتونو ژوره اندیښنه ښودلې وه او د هغوی وضعیت یې ډیر سخت بللی دی.
که څه هم د سوريې الرقه ښار اوس هم د داعش وسله والو په ولکه کې دی، خو د سوريې د ديموکرات ځواک له خوا کلابند دی او د امريکا هوايي ځواک په مرسته يې د بيرته نيولو هڅې روانې دي، خو بل پلو ديرالزور ښار په سوريه کې د داعش ډلې تر ټولو وروستۍ او مهم مرکز بلل کېږي.
