ماليزيا کې د يوې مدرسې ۲۳ زده کوونکي وژل شوي
(کابل ټکی کام ۱۳۹۶وږی ۲۳): د ماليزيا چارواکي وايي، چې د دغه هېواد په مرکز کولالمپور کې د اورلګېدو له کبله د يوې دينې مدرسې ۲۳ زده کوونکي او دوه ساتونکي وژل شوي دي.
د سرچينې په وينا، اور سهار وختي په هغه ودانۍ کې بل شوی، کومه کې چې د دينې مدرسې شاګردان زده کړې کوي.
د ښار د اوروژنې عملې يو تن مشر خيرالدين درهمن رسنيو ته د ۲۳ تنو زده کوونکو او ۲ ساتونکو مړينه تائيد کړې ده.
د دغه هېواد لومړي وزير نجيب رزاق د پېښې قربانيانو سره غمرازي ښودلې ده.
راپورونه وايي، چې يو شمير ټپي زده کوونکي د تداوۍ لپاره روغتون ته هم وړل شوي دي.
تر اوسه پورې د مړو شويو زده کوونکو عمرونه نه دي په ډاګه شوي، خو ويل کېږي چې په يادو ښوونځيو کې له ۶ تر ۱۸ کلونو ماشومان د قران کريم زده کړې کوي.
حکومتي مسئولينو ويلي، چې د يادې پېښې په اړه يې پلټنې پيل کړي، ترڅو د اورلګېدو علت معلوم کړي.
د راپورونو پر بنسټ تر دې مخکې هم په ماليزيا کې لسګونه ځله دغه ډول پېښې رامنځته شوي، چې له کبله يې سلګونه زده کوونکو خپل ژوند له لاسه ورکړی دی.
