چارواکي: د جغتو ولسوالۍ امنيه قوماندان ووژل شو
(کابل ټکی کام ۱۳۹۶وږی ۲۳): د غزني ولايت چارواکي وايي، چې نن سهار د دغه ولايت د جغتو ولسوالۍ امنيه قوماندان د ماين په چاودنه کې وژل شوی دی.
د غزني د پوليسو وياند فهيم امرخېل د نوموړي وژل کېدل تائيد کړي او ويلي يې دي، چې د جغتو ولسوالۍ پر امنيه قوماندان محمد اسحاق جليلي نن سهار د اوو بجو په شاوخوا کې د ګلبوري په سيمه کې هغه مهال چاودنه وشوه، چې نوموړي د يادې ولسوالۍ امنيتي پوستو څخه ليدنه کوله.
ويل کېږي، په دغه چاودنه کې د نوموړي موټر ويجاړ شوی خو بل چاته پکې زيان نه دی اوښتی.
تر اوسه د دغه چاودنې مسئولیت کومې وسله والې ډلې په غاړه نه دی اخيستی، خو د جغتو ولسوالۍ په زياته برخه کې وسله والو طالبان فعاليت کوي او وخت ناوخت په دولتي ځواکونو چاودنې او بريدونه ترسره کوي.
