د نوازشريف مېرمن کلثوم نواز پارلمان ته بريالۍ شوه
(کابل ټکی کام ۱۳۹۶وږی ۲۷): د پاکستان د پخواني لومړي وزير ميرمن کلثوم نواز هغه پارلماني ټاکنه کې بريالۍ شوه، چې څه موده مخکې د هغې خاوند نوازشريف د دغه هېواد د سترې محکمې له لوري ناهله وټاکل شو او څوکۍ يې خالي پاتې شوه.
د جولای په مياشت کې د پاکستان سترې محکمې نوازشريف نااهله اعلان کړ او له هغې وروسته په پارلمان کې د هغه څوکۍ خالي پاتې شوې وه. پر نوموړي او کورنۍ یې تورونه دي چې له هېواده بهر یې پټې شتمنۍ لرلې.
تېره ورځ يادې څوکۍ ته د پاکستان د مختلفونو ګوندونو ۴۴ تنو نوماندانو ځانونه کانديد کړي و.
د پاکستاني رسنيو د راپورنو له مخې په لاهور کې د پارلمان د ۱۲۰ حلقې په ۲۲۰ مرکزونو کې خلکو رأیه اچونه وکړه چې په نتیجه کې د مخکیني صدراعظم نواز شریف مېرمن کلثوم نواز تر ۶۰ زرو زیاتو رأیو په ګټلو لومړی او د تحریک انصاف ګوند کاندیدې ډاکټر یاسمین رشید د شاوخوا ۵۰زرو رأیو په ګټلو دوهم مقام ترلاسه کړ.
ويل کېږي د ټاکنو لپاره کلثوم نواز خپله کمپاین نه و کړی، ځکه هغه اوس هم په لندن کې ده او د سرطان درملنه یې روانه ده، د هغې لپاره يې کمپاين د لور مريم نواز له خوا پر مخ وړل کېدو.
د یادونې وړ ده چې په لاهور کې د ټاکنو لپاره کلک امنیتي تدابیر نیول شوي او د رأیې اچوونې په ټولو مرکزونو کې پوځ ځای پر ځای شوی و.
د ټاکنو د پایته رسیدو او لومړنیو نتایجو د اعلانیدو نه وروسته د پاکستان د مسلم لیګ نواز شریف ګوند خپل بری اعلان کړ او په جشنونو يي لاس پورې کړ.
