(کابل ټکی کام ۱۳۹۶ وږی ۳۱ فرید افغان)
راپورونه وایي چې تیره ورځ ګډو ځواکونو د ننګرهار ولایت مرکز جلال آباد ښار کې په شپینۍ چاپه کې ولسي وګړي او د دولت اړوند کسان په نښه کړي.
سیمیز خلک وایي چې ځانګړو ځواکونو د کور خلک لمړی یوې خونې ته راټول کړي او بیا یې پرې ډزې کړې چې له امله یې ګڼ کسان مړه او ژوبل شوي دي.
په وژل شویو کسانو کې د ننګرهار د ګمرک يو کارکوونکى، د مخکيني ولسمشر حامد کرزي يو موټر چلوونکى او يو بل دولتي کس وژل شوي دي معلومه نده چې یاد کسان دې کور ته میلمانه راغلي و او که د کور خاوندان و.
سرچینو پژواک ته وایلي چې ګډو ځواکونو په بل کور د برید تابیا نیولې وه چې اصلي کور ترې غلط شوی او په نتیجه کې یې په لوی لاس ولسي خلک وژلي دي.
بلخوا د ننګرهار د ګمرک رييس الهام الدين مظفر رسنیو ته ويلي چې تېره شپه نهه بجې د بيز اکمالاتي په ساحه کې د بهرنيو ځواکونو له خوا درې تنه وژل شوي، چې يو په کې د ګمرک رياست د سکرتريت د شعبې کمپيوټرکار و
خو ځایي خلک بیا دا ادعا نمني او په وینا یې چې د ۰۲ په نامه د افغان ځواکونو ځانګړې قطعې په قصدي ډول دا کړنه ترسره کړې ده.
د ننګرهار د والي ویاند عطاؤالله خوږیاڼی پیښه تائید کړې او د جزیاتو له ورکولو یې ډډه کړې ده.
باید وویل شي چې دا لمړی ځل ندی چې په لوی لاس ملکي خلک یا هم د دولت اړوند کسان په نښه کیږي بلکه په تیر کې هم دا چاره په ځلونو تکرار شوې چې یا خو افغان چارواکو تیروتنه بللې او یا یې هم په اړوند له څه ویلو ډډه کړې ده.
