(کابل ټکی کام ۱۳۹۶ وږی ۳۱ فرید افغان)
نن ورځ د مس عینک او د بند امیر تر منځ د شپږیزې تورنمنټ وروستۍ او د پای لوبه وه چې پکې د نبي عیسی خیل لوبډلې د راشد خان له لوبډلې په پنځو منډو ماتې وخوړه او د دې لوبو اتلولي د راشد خان لوبډلې په برخه شوه.
بند امیر لوبډلې د لوبې پچه وګټله او د ټولو اورونو په لوبولو سره یې سیال ټیم ته د ۱۵۹ منډو هدف وټاکه، چې له ډلې یې جاوید احمدي ۵۵، حضرت الله ځاځي ۳۵ او شاهدالله ۲۲ تر ټولو زیاتې منډې و کړې.
په ځوابي توپوهنه کې د مس عینک لوبډله د شپږو لوبغاړو په سوزیدو سره یواځې د ۱۵۴ منډو په جوړولو بریالۍ شوه او لوبه یې د ۴ منډو په توپیر وبایلله.
د مس عینک له لوري سکندر رضا ۴۰ او محمد نبي ۲۷ تر ټولو ډیرې منډې وکړې.
د پای لوبې غوره لوبغاړی د بند امیر د ډلې جاوید احمدي وټاکل شو.
باید وویل شي چې د شپږیزې په دې سترو سیالیو کې نږدې دیرش تنو بهرني لوبغاړو، مبصرینو او روزونکو برخه اخیستې وه.
چې د ټول تورنمنټ په کچه غوره لوبغاړی کریم صادق ونومول شو.
او د بالینګ په برخه کې ظاهر د ۱۵ ویکټو په اخیستو سره د لیګ د ځوان لوبغاړی، چیتارا د ۱۳ ویکټو په اخیستو سره د لیګ غوره توپ اچونکی او اصغر ستانکزی د لیګ غوره توپ وهونکی په توګه وپیژندل شول.
د افغانستان کرکټ بورډ وايي د دې پایلوبې د لیدلو لپاره زرګونه نندارهچیان ورغلي وو.
باید وویل شي چې د هیواد د زونونو په کچه د شپږیزه کرکټ ۲۰ اوریزې سیالۍ سږ کال د شپږو ټیمونو تر منځ د سپټمبر په ۱۱ مه پیل شوې وې چې نن یې پایلوبه د بند امیر ښامارانو ټیم په اتلولۍ پای ته ورسېده.
