سعودي عربستان ښځو ته د موټر چلولو جواز ورکړ
(کابل ټکی کام ۱۳۹۶تله ۵): د سعودي پاچا ملک سلمان بن عبدالعزيز د يوه ځانګړي فرمان له مخې په هغه هېواد کې تېره شپه ښځو ته د موټر چلولو د جواز ورکولو اجازه ورکړه.
دا لومړی ځل دی، چې سعودي حکومت له تيرو څو لسيزو وروسته ميرمنو ته د موټرچلونې اجازه ورکوي.
په دغه فرمان کې د مېرمنو د موټر چلونې ګټې او د هغې زيانونه په ګوته شوي او دغه راز په فرمان کې راغلي چې د سعودي عربستان د علماوو ټولنې فتوای ورکړې چې ((شريعت ښځو ته د موټر چلولو اجازه ورکړې ده)) او زياته کړې يې ده چې په دې اړه يې په قانون جوړولو کار پيل کړی، د راتلونکې کال له نيمايي وروسته به مېرمنو ته د موټر چلولو اجازه ليکونه ورکړل شي.
دا په داسې حال کې ده، چې د سعودي حکومت څه موده وړاندې په لومړي ځل ښځو ته په جشنونو او عامو محفلونو کې له نارينه وو سره د ګډون اجازه هم ورکړه.
ويل کېږي، چې د سعودي د پاچا ملک سلمان له لوري به يو شمير نور اقتصادي، سياسي او ټولنيز بدلونونه هم راوستل شي.
څو ورځې وړاندي د سعودي د علماو د شورا یوه غړي ښځې په عقل او دین ناقصې وبللې او وې ویل چې له همدې وجې هغه نه شي کولای چې موټر وچلوي، چې له امله یې نوموړی د حکومت له لوري ونیول شو او تر اوسه یې درک نشته.
بايد وويل شي، چې سعودي حکومت په وروستيو څو مياشتو کې د لسګونو مشهورو علماؤ د بندي کولو تر څنګ سلګونه علماء او دعوتګر نيولي او دالړۍ لا هم روانه ده.
