دایکندي: مسافر وړونکې الوتکې بېړنۍ ناسته کړې
(کابل ټکی کام ۱۳۹۶تله ۱۱):د دایکندي ولایت چارواکي وايي، نن یوې پوځي مسافر وړونکې الوتکې بېړنۍ ناسته کړې؛ خو سپرلیو ته یې کوم زیان نه دی اوښتی.
د یاد ولایت چارواکي وايي، په دغه پېښه کې یوازې الوتکې ته زیان اوښتی؛ خو مسافر روغ رمټ دي.
ټاکل شوې وه، نن د دایکندي لپاره نوی ټاکل شوی والي محمود بلیغ د دغه ولایت خلکو ته وروپېژندل شي او د مراسمو لپاره یې له کابل څخه هم مېلمانه بلل شوي وو.
محمود بلیغ له دې وړاندې د ټولگټو چارو وزیر و، چې د گډ حکومت د لومړي مشر اشرف غني په امر د دایکندي د نوي والي په توگه ټاکل شوی دی.
