کرزی: حکومت دې د بهرنيانو د خپلسرو کړنو مخه ونيسي
(کابل ټکی کام ۱۳۹۶تله ۲۲): د افغانستان پخوانی ولسمشر حامدکرزي، په کنړ کې پر ولسي وګړو د امريکايي ځواکونو هوايي بريد غندلی او دا يې بشري ضد جنت او د ټولو نړيوالو اصولو او موازينو خلاف عمل بللی دی.
نوموړي په يوه مطبوعاتي اعلاميه کې، د ملکي مرګ ژوبلې په زياتوالي هم اندېښنه څرګنده کړې او د ګډ حکومت څخه يې غوښتنه کړې، چې د بهرنيو ځواکونو د خپلسرو کړنو مخه دې ونيسي او پر ملکيانو د هغوی د بمباريو غندنه دې وکړي.
په اعلاميه کې راغلي، چې (حامد کرزی د لوی خدای له درباره د دغې غمجنې پېښې شهیدانو ته د جنت، کورنۍ او دوستانو ته یې جمیل صبر او ټپیانو ته د سملاسی روغتیا استدعا کوي.)
ځايي اوسېدونکو او په ولسي جرګه کې د کنړ استازي شهزاده شاهد رسنيو ته ويلي، چې د امریکايي ځواکونو د بې پيلوټه الوتکه په دغه بريد کې شاوخوا شل تنه ملکيان وژل شوي، چې د يوه واده په خوشحالۍ کې د ګډون لپاره راټول شوي و.
په هېواد کې په ملکي وګړو د امريکايي ځواکونو وروستی هوايي بريد په داسې حال کې کېږي، چې تېره ورځ په افغانستان کې د ملګرو ملتونو ادارې يوناما په يوه خپور کړي راپور کې وویل، چې د تېر کال په پرتله په هوايي بریدونو کې د ملکي تلفاتو شميره ۵۲ سلنه لوړه شوې ده.
په راپور کې راغلي، چې د ۲۰۱۷م کال د پیل راهيسې د سپتمبر تر پايه ټول ۲۰۵ ملکي وګړي په هوايي بريدونو کې وژل شوي او ۲۶۱ نور ټپيان دي، چې په دې کې ډیری برخه يې د افغان هوايي ځواکونو مسئوليت بللی او په راپور کې يواځې ۳۸سلنه مسئوليت پر بهرنيو ځواکونو اچول شوی دی.
