ملي امنیت شورا: د «سولې» لپاره «هیلې» رامنځته شوې؛ خو پر «جگړه» هم فکر کوو
(کابل ټکی کام ۱۳۹۶تله ۲۲): د گډ حکومت د ملي امنیت سلاکار محمد حنیف اتمر د افغانستان او پاکستان لپاره د انگلستان د ځانگړي استازي سره په خبرو کې ویلي، چې د سولې لپاره مثبته روحیه رامنځته شوې او دوی سولې ته ورځ تر بلې نږدې کېږي.
د ملي امنیت شورا له لوري په خپره شوې خبرپاڼه کې ویل شوي، چې دواړو لوریو په خپلو خبرو کې سولې ته هیله مندي ښودلې ده.
د ملي امنیت شورا ویاند قادرشاه له رسنیو سره په خبرو کې ویلي، چې د افغانستان او پاکستان لپاره د انگلستان د شاهي دولت د لومړي وزیر له ځانگړي استازي اون جینکس سره په ناسته کې حنیف اتمر د ټرمپ نوې ستراتېژي د سیمې لپاره گټوره بللې ده.
دا لومړی ځل نه دی، چې افغان چارواکي له بهرنیو سره په ناستو کې سولې ته د نږدې خبرې کوي او داسې ښيي، چې گوندې څو ورځو کې به سوله وشي.
وسلهوالو طالبانو په بیا ـ بیا له افغان دولت سره د سولې خبرو څخه انکار کړی او ټینگار یې کړی، چې د جگړې د اصل لوري امریکا سره خبرې کوي؛ نه له افغان دولت سره.
د ملي امنیت شورا سولې ته د مثبتې روحیې خبره داسې مهال کوي، چې راتلونکې دوشنبه د عمان په پلازمېنه مسقط کې د امریکا، چین، پاکستان او افغان دولت استازي د سولې اړوند ناسته کوي.
طالبانو په دغه ناسته کې خپل گډون رد کړی او خپل استازي یې د دې ناستې ورتگ نه منعه کړي دي.
د وسله والو طالبانو ویاند ذبیح الله مجاهد رسنیو ته په لېږل شوې خبرپاڼه کې ویلي وو، چې دغه ډول ناستې یوازې د وخت ضایع ده او سولې لپاره هېڅ گام نه اخیستل کېږي.
امریکا د سولې ډنډوره داسې مهال غږوي، چې تېره سپټمبر میاشت کې یې پر افغانستان ۷۵۱ بمونه غورځولي وو، چې ډېر ولسي وگړي پکې شهیدان شوي وو.
