کندهار: طالبانو د معروف ولسوالۍ مرکز نیولی
(کابل ټکی کام ۱۳۹۶ تله ۲۴ فرید افغان)
د کندهار امنیتي سرچینو رسنیو ته تائید کړې چې تیر ماښام طالب وسلوالو په یوه تهاجمي برید کې د دې ولسوالۍ مرکز نیولی او لا هم جګړه روانه ده.
سرچینو ویلي چې طالبانو یاده ولسوالۍ له تیرو څو ورځو راهیسې محاصره کړې وه چې تیر ماښام ۷ بجې یې پرې خپل بیرغ ځوړند کړ.
د سرچینې په خبره ماښام مهال چورلکو د ولسوالۍ له مرکز څخه د ګډوځواکونو مړي او ټپیان ولېږدول او په وینا یې چې پاتې ځواکونه د سالیسون په نوم سیمې ته شاتګ کړی او مرکز یې وسله والو طالبانو ته پرېيښي دی.
د کندهار سیمیزو چارواکو تر اوسه پورې رسما د دې خبر تائید ندی کړی.
طالب ویاند قاري یوسف احمدي بیا تیره ورځ په یاده ولسوالۍ کې د دوو پوستو نیول منلي و.
دې ډلې پرون شپه د ولسوالۍ د دوو امنیتي پوستو خوګیاڼو او نیکو په نوم تر نیولو وروسته ۱۲ افغان عسکر وژلي او ۱۶ تنه یې ژوندي نیولي وو.
د یادولو ده چې تیره اونۍ هم طالبانو په یاده ولسوالۍ باندې مرګونی تهاجمي برید کړی و، چې پکې لسګونه افغان ځواکونو ته مرګ ژوبله واوښته.
په همدې حال کې د کندهار چارواکو د غورک د ولسوالۍ د نیولو خبر ورکړی چې طالبان یې شاتګ ته اړ کړي.
خو سرچینې وایي چې په یاده ولسوالۍ کې لا هم طالبان خپل حاکمیت لري.
