ننګرهار: د ګډو ځواکونو په عملياتو کې ۸ ولسي وګړي وژل شوي
(کابل ټکی کام ۱۳۹۶تله ۲۴): د ننګرهار ولايت په پچير اګام ولسوالۍ کې افغان او امريکايي ځواکونو ګډ عمليات کړي، چې په ترڅ کې يې ۸ ولسي وګړي وژل شوي دي.
پېښه د يادې ولسوالۍ د پاس صبر په سيمه کې رامنځته شوې ده.
ځايي اوسېدونکي وايي، ګډو ځواکونو د عامو خلکو په کورونو چاپه واچوله او د يوې کورنۍ درې کسان، يو پلار دوه ځامن، د بل کور يو پلار يو ځوی او درې کسان يې له جلا کورونو راوويستل او په ډزو سره يې شهيدان کړل.
ځينو سرچينو د لسو عامو خلکو د شهيدانولو خبر ورکړی دی.
تر اوسه پورې د دغه ولايت امنيتي مسئولينو او په افغانستان کې ميشت بهرنيو ځواکونو په دې اړه څه نه دي ويلي.
د افغانستان په اړه د امريکا د نوې تګلارې له اعلان وروسته په هېواد کې د ګډو ځواکونو هوايي بريدونه او شپني عمليات زيات شوي، چې تر ډېره يې قربانيان ولسي وګړي دي.
